Grupi Parlamentar i Partisë Demokratike ka depozituar në Gjykatën Kushtetuese kërkesën për shfuqizimin e ligjit të miratuar me 71 vota pro nga mazhoranca për detyrimin e studentëve të mjekësisë për të punuar për 5 vite në Shqipëri pas përfundimit të studimeve duke u a mbajtur “peng” diplomat.
Kërkesa është firmosur nga 30 deputetë të opozitës, teksa depozitimi i ankimit në GJK është njoftuar nga kreu i grupit parlamentar të PD-së, Gazment Bardhi përmes një postimi në rrjetet sociale.
Ai shkruan se deputetët e opozitës mbështesin kërkesën e studentëve të mjekësisë për të kundërshtuar në Gjykatën Kushtetuese ligjin që nuk pajisë për 5 vite me diplomë mjekët e rinj, teksa i bën apel qeverisë që të dëgjojë zërin dhe shqetësimin e studentëve dhe ti jap zgjidhje kërkesave të tyre.
“GPPD ka mbështetur kërkesën e studentëve të mjekësisë për të kundërshtuar në GjK ligjin që pezullon diplomimin e mjekëve të rinj për 5 vite. Duke respektuar reagimin e studentëve dhe protestën e tyre, pa asnjë ndërhyrje politike, apelojmë edhe njëherë për Qeverinë që të dëgjojë zërin dhe shqetësimin e studentëve dhe ti jap zgjidhje kërkesave të tyre.” – shkruan Bardhi.
Në një deklaratë për mediat pak ditë më parë, deputetja demokrate Albana Vokshi argumetoi se pse nisma e mazhorancës është joligjore dhe denoncoi sesi u frynë kosot e studimeve në relacionin e qeverisë.
Bojkoti dhe protestat vijojnë
Ndërkohë, studentët e mjekësisë vijojnë bojkotin e mësimit dhe protestat si një formë kundërshtimi ndaj ligjit të mazhorancës.
Edhe ditën e sotme, protesta ka nisur nga fakulteti i tyre pranë QSUT për të marshuar drejt Ministrisë së Arsimit.
Gjatë gjithë protestës studentët janë mbikëqyruar nga forcat policore të cilat kanë bërë të mundur edhe devijimin e trafikut në rastet kur të rinjtë bllokonin qarkullimin në pjesë të ndryshme rrugës.
Me thirrjet “ANULONI LIGJININ” të rinjtë i janë drejtuar Ministrisë së Arsimit. Në shenjë revolte ndaj heshtjes së ministrisë kanë hedhur letra higjienike ne drejtim të dikasterit të Arsimit, ndërsa nuk kanë munguar simbolikat e ndryshme gjatë protestës si për të treguar prangosjen e lirisë së tyre.
Protestës së studentëve mjekësisë ju bashkuan dhe të rinj nga Fakulteti i Infermierisë të cilët të ardhmen e tyre e kanë përkrah mjekëve. Rreth mesditës të rinjtë protestues janë shpërndarë qetësisht, por të vendosur për të vijuar bojkotin pa afat.
