Liderët e vendeve të BE dhe Ballkanit Perëndimor firmosën sot në samitin e Tiranës marrëveshjen për njohjen e ndërsjellë të kualifikimeve profesionale. Kjo ka si qëllim njohjen e 7 profesioneve në vendet e BE-së, duke lehtësuar më tej lëvizjen e profesionistëve dhe shfrytëzimin e potencialit të burimeve njerëzore. Konkretisht kualifikimevt profesionale të infermierëve, veterinerëve, farmacistëve dhe mamive në kontekstin e marrëveshjes së tregtisë së lirë të Evropës Qendrore, (CEFTA). Vitin e kaluar u njohën mjekëve, stomatologëve dhe arkitektëve. Këtë marrëveshje e ka nënshkruar kryeministri i Kosovës Albin Kurti, ai i Malit të Zi Dritan Abazoviç, i Maqedonisë Dimitar Kovaçevski dhe Presidentja serbe Ana Bërnabiç.
Po ashtu, u zhvillua ceremonia për inaugurimin e Kolegjit Evropian në Tiranë, me godinë te Piramida, ku u mbajt edhe samiti. Kolegji do të hapë dyert për studentë vitin e ardhshëm akademik.
Presidentja e Komisionit Evropian Ursula Von Der Leyen tha se në këtë kolegj të Evropës do të ketë studentë nga Shqipëria, Ballkani Perëndimor dhe gjetkë. “Do të kemi të rinj që do të studiojnë këtu dhe do të flasim për shndërrimin që ka pësuar BE dhe do të hedhin dhe themelet për të qenë udhëheqës së të ardhmes, dhe ambasadorë të ardhshëm të idesë evropiane”, tha Von Der Leyen.
Presidenti i Këshillit Europian, Charles Michel u shpreh se momenti në të cilin ndodh ky përurim është shumë simbolik. “Në vitin 1992 u krijua dega e Natolinit në Poloni për Kolegjin e Evropës dhe ashtu këto vende, pas rënies së Perdes së Hekurt, po bëheshin gati për anëtarësimin e tyre në BE. Dhe tashmë kemi një degë tjetër të Kolegjit të Evropës në një moment kur Shqipëria dhe vendet e tjera të BE, përpiqen dhe bëhen gati për të ardhmen e tyre në BE”, theksoi ai.
