Shtatë vite pas arritjes historike të kualifikimit në Europian, Shqipëria e sheh veten edhe një herë një hap larg një arritjeje të tillë, në krye të grupit E, e distancuar me katër pikë nga Polonia ndjekëse.
Praktikisht skuadrës së Silvinjos në rastin më të keq i duhen vetëm 2 pikë për t’u kualifikuar në Europian në dy ndeshje të mbetura ndaj Moldavisë dhe Ishujve Faroe. Por ku janë vendet e tjera të rajonit?
Nëse i bëjmë një “xhiro” situatës së grupeve të këtyre eliminatoreve, mund të themi se Kombëtarja jonë është në situatën më komode dhe e vetmja kombëtare që kryeson grupin e vet nga skuadrat e rajonit.
Maqedonia e Veriut, e kualifikuar në Europianin e kaluar, e sheh veten në vendin e katërt me shtatë pikë të grumbulluara.
Kosova e ka thuajse të pamundur të kualifikohet. Dardanët renditen të katërtit në grupin I, gjashtë pikë larg Rumanisë së vendit të dytë.
Në grupin G, Serbia dhe Mali i Zi janë në garë për një vend në Europian. Kombëtarja e Vlahoviçit ka dy pikë më shumë (10) dhe renditet e dyta pas Hungarisë (13).
Edhe Greqia e sheh të jetë mjaft e vështirë. Në grupin B, ku janë edhe francezët e holandezët, fqinjët tanë renditen të tretët me 9 pikë, po aq “tulipanët” me një ndeshje më pak.
Pa asnjë modesti mund të themi se kemi Kombëtaren më në formë në rajon dhe jemi më afër se të gjithë me Berlinin, madje më pranë edhe se Kroacia, që renditet e dyta në grupin e saj.
