Studentët e Fakultetit të Mjekësisë kanë dalë sërish këtë të hënë në protestë, për të kundërshtuar ligjin që i detyron ata të qëndrojnë në Shqipëri pas përfundimit të studimeve.
Kjo është java e dytë e vitit të ri akademik dhe ashtu si ishte paralajmëruar prej muajsh, sallat e fakultetit janë vetëm me pedagogë, sepse vetë studentët kanë zgjedhur bojkotimin e procesit studimor.
Këtë të hënë ata kanë bllokuar godinën e kuqe dhe siç kanë thënë protestat e tyre do të përshkallëzohen, duke dalë çdo ditë për të kundërshtuar këtë vendimmarrje që ndonëse ndikon drejtpërdrejtë te ta, zëri i tyre është shpërfillur nga institucionet, sakaq çështja ka kaluar dhe në Gjykatën Kushtetuese.
Pas tubimit tek godina e kuqe, studentët kanë nisur marshimin drejt Ministrisë së Arsimit. Me pankarta në duar ata kërkojnë shfuqizimin e ligjit.
