Çmimi global i sheqerit arriti në nivelin më të lartë të 13 viteve të fundit në muajin shtator, për shkak të shqetësimeve për ndikimin e fenomenit El Nino në të mbjellat në Tajlandë dhe Indi, deklaroi ditën e sotme Organizata e OKB-së për Ushqimin dhe Bujqësinë (FAO).
Indeksi i çmimit të sheqerit, i llogaritur nga FAO, u rrit me 9.8% në një muaj.
“Kjo rritje është kryesisht për faktin se ne gjithnjë e më shumë i frikësohemi kufizimit të furnizimit global në korrjen e ardhshme (2023-2024)”, shpjegoi organizata në raportin e saj mujor.
Vlerësimet paraprake tregojnë një rënie të prodhimit në Tajlandë dhe Indi, eksportuesit e dytë dhe të tretë më të mëdhenj të sheqerit në botë, për shkak të El Nino.
Ky fenomen meteorologjik shoqërohet me një rritje të temperaturës globale dhe shoqërohet me thatësirë në disa pjesë të botës dhe reshje të mëdha shiu në të tjera.
Megjithatë, FAO vlerësoi se çmimet e sheqerit u frenuan nga “vëllimi i madh i të korrave në Brazil”, prodhuesi dhe eksportuesi më i madh në botë.
Nga ana e tyre, çmimet globale të ushqimeve u stabilizuan në shtator, ku çmimi i vajrave ra me 3.9%, i qumështit me 2.3% dhe i mishit me 1%, duke kompensuar rritjen e çmimeve të sheqerit dhe misrit.
Indeksi i çmimeve të ushqimeve të agjencisë, i cili gjurmon ndryshimet e çmimeve në një shportë me produkte, është ulur 10.7% nga viti në vit dhe 24% më poshtë nga kulmi i tij në mars 2022 pas pushtimit nga Rusia në Ukrainë.
Në të njëjtën kohë, FAO njoftoi parashikimet e saj për prodhimin botëror të drithërave në vitin 2023, që arrijnë në 2.819 milionë tonë.
