Ministrja e Jashtme e Kosovës, Donika Gërvalla nga Tirana u shpreh se Serbia po sillet si një mini Rusi e vogël.
Sipas saj, me Beogradin nuk do të ketë diskutime nëse nuk do të ketë një reagim nga ndërkombëtarët për të sanksionuar Serbinë.
Gervalla: “Gjermania është një ndër shtyllat kryesore të mbështetjes së Kosovës. SHBA, Gjermania, Mbretëria e Bashkuar janë të shqetësuar për ngjarjet në veri të Kosovës, ku jemi ballafaquar me një agresion të qartë.
Të merren të gjitha masat e nevojshme që një gjë e tillë mos të përsëritet jo vetëm në Kosovë, por në asnjë vend sepse Serbia sillet si një mini Rusi e vogël.
Prioritet kryesor i institucioneve të Kosovës këto ditë është siguria. Ne duhet të sigurohemi që armatimi që kemi gjetur është armatim për më shumë se 400 persona. Ne kemi gjetur arme edhe në ditët në vijim, prandaj është e rëndësishme siguria. Sesi do të vazhdojë procesi i negociatave, varet nga reagimi i bashkësisë ndërkombëtare. Nëse ata e lanë Serbinë të kalojë pa konsekuenca nga një sulm armiqësor ne e shohim të pamundur vazhdimin e bisedimeve. Duhet të ketë prioritet siguria, po them që procesi i dialogut nuk duhet të jetë sa për të bërë foto, por për sukses.
Pa sanksionuar Serbinë ajo nuk ka për ta mësuar mësimin, pa e sanksionuar Serbinë edhe qytetarët e Serbisë nuk e ngrenë dot zërin”
