Policia e Lezhës ka arrestuar mjekun ligjor të spitalit të Rrëshenit, pasi akuzohet për korrupsion.
Në pranga është vënë shtetasi Z. P., 63 vjeç, banues në Rrëshen. Ai u arrestua pas kallëzimit të shtetasit Gj. S., 55 vjeç, banues në fshatin Spiten, Lezhë, se mjeku ligjor i kishte kërkuar dhe i kishte marrë 100 euro për të kryer një akt ekspertimi mjeko-ligjor për një çeshtje të 55-vjeçarit.
Policia thotë se në vijim të veprimeve procedurale për këtë rast u sekuestrua si provë materiale, shuma 100 euro që 63-vjeçari i mori shtetasit Gj. S., në kundërshtim me ligjin.
Materialet procedurale i kaluan Prokurorisë së Lezhës për veprime të mëtejshme, për veprën penale “Korrupsioni pasiv i personave që ushtrojnë funksione publike”.
Autoritet bëjnë me dije se ky rast është ndjekur në bashkëpunim me gazetarët e emisionit investigativ “Piranjat”.
