Gjin Guri personi që mbeti i plagosur në ngjarjen e rëndë në Dukagjin ndërsa babai i tij Zef Guri u qëllua për vdekje, ka hedhur poshtë pretendimet e policisë vendore të Shkodrës se djali i xhaxhait Gjovalin Guri është autori i kësaj ngjarje të rëndë. Në një intervistë për News24 nga spitali Ushtarak në Tiranë, Gjin Guri e quan të turpshëm faktin që policia ka shpallur në kërkim kushëririn e tij Gjovalin Guri si autor i dyshuar.
Edhe i dyshuari Gjovalin Guri një ditë më parë nga arratia mohoi akuzat ndaj tij të cilat i hedh poshtë edhe vetë i plagosuri Gjin Guri i cili kërkon nga policia që të gjejë autorët e vërtetë të vrasjes së babait dhe jo të akuzojë djalin e xhaxhait që sipas tij nuk ka asnjë lidhje me ngjarjen e rëndë që ndodhi më 27 shtator në aksin Shosh-Kir në Dukagjin. 46-vjeçari, i cili mori katër plumba në trup por arriti t’i shpëtojë këtij atentati thotë se nuk ka patur asnjë konflikt me asnjë person për pyllin në njësinë Shosh, e cila është edhe pista kryesore për të cilën po heton policia.
Gjin Guri tregon edhe se si ndodhi ngjarja teksa po vinte me babain nga Shoshi në drejtim të Shkodrës me kamionçinë, papritur është qëllua me automatik nga të paktën dy persona që ndodheshin të fshehur disa metra mbi rrugë ndërsa devijoi me dashje në humnerë për t’i shpëtuar breshërisë së plumbave.
“Më kanë thënë nusja dhe djali se kanë akuzuar djalin e axhës. Ky është turpi që është në këtë tokë. Për me e nxjerr edhe djalin e axhës autor, kjo nuk bën vaki. S’kam asnjë të keqe dhe asnjë gjë në mendje se është ai. Ata janë 7 vëllezër dhe unë i vetëm me i vra të gjithë ata dhe nuk ma ngrenë pushkën, jo më me pas gisht djali i axhës. Shteti më ka vrarë edhe mua vetë, kur ka akuzuar djalin e axhës. Shteti të gjejë autorët dhe jo të merret me djemtë e axhës tim. Të gjendet autori. Nuk janë autorët djemtë e axhës, atyre as iu shkon ndër mend me e bë këtë punë. Unë ha, dal pi e rri me ata.
Tek asnjë njeri nuk kam dyshime, puna më e keqe që ka bërë shteti shqiptar është si më kanë akuzuar djemtë e axhës. Muhabet kam pas, jo konflikt.
Unë isha duke ardh me makinë prej Malit të Shoshit me ardhë në Shkodër me gjithë babën. Sa kam kaluar qafën e Shoshit, punë 200 metërsh ka kris një breshëri automatiku, as nuk kam parë njeri. Kam ik me gjithë makinë. Kam marrë telefonin e babës, se timin se kam parë dhe kam marrë nipin dhe i kam thënë që më kanë gjuajtur dhe kanë vrarë babën e më kanë plagosur mua. S’kam parë as njeri. Kam qëndruar rreth 40 minuta se erdhi nipi dhe nuk ka gjet vendin se ku kisha hyrë poshtë.” – ka deklaruar Gjin Guri.
Këtë deklaratë i plagosuri Gjin Guri e ka dhënë edhe për Policinë e Shtetit duke hequr çdo dyshim të mundshëm se vrasja e babait të tij Zef Guri është bërë nga kushëriri Gjovalin Guri dhe duke i kërkuar policisë që të gjejë autorët e vërtetë.
