Ministria e Punëve të Brendshme të Serbisë ka bërë të ditur se ka arrestuar ditën e sotme Milan Radoiçiç, të cilit i është caktuar masa e ndalimit deri në 48 orë.
“Më 3 tetor 2023, zyrtarët policorë të Drejtorisë së Policisë Kriminale kanë bastisur banesën dhe lokalet tjera të Milan Radoiçiçit, i cili është urdhëruar që policia të ndalojë deri në 48 orë”, njofton MPB e Serbisë.
Ai akuzohet se ishte udhëheqësi i sulmit terrorist të 24 shtatorit në Bannjskë në Veri të Kosovë, ku u vra në krye të detyrës efektivi i Policisë së Kosovës, Afrim Bunjaku dhe u plagosën dy të tjerë. Kjo e vërtetuar përmes pamjeve filmike dhe e pranuar më vonë dhe prej tij, ku dha dorëheqjen dhe nga posti i nënkryetarit të Listës Srbska.
Më 30 shtator, Radojçiç iu përgjigj një ftese të autoriteteve serbe për të dhënë versionin e tij lidhur me atë që ndodhi në Banjskë të Kosovës më 24 shtator. Avokati i tij mbrojtës lexoi letrën ku merrte përgjegjësi të plotë, ndërsa në shumicën e fjalive përpiqej që të shfajësonte Serbinë, presidentin Vuçiç dhe Listën Serbe. Mes rreshtave konfirmoi dhe akuzën e autoriteteve të Kosovës, teksa theksoi se synimi i sulmit të armatosur ishte nxitja e rebelimit të serbëve lokalë në veri të Kosovës për të vendosur një lloj autonomie me forcë.
Kujtojmë se pas ngjarjes së rëndë, Forcat Speciale të Policisë së Kosovës rrethuan manastirin e Banjskës dhe nga përplasja me armë zjarri u ekzekutuan tre terroristët Stefan Nedeljković, Igor Milenkvić, Bojan Mijailović.
Arrestimi i Milan Radoiçiç vjen pas presionit të ShBA-së dhe BE-së ndaj Serbisë për të vënë para drejtësisë përgjegjësit e sulmit terrorist.
