Një person është shpallur në kërkim për vrasjen e ndodhur në Shkodër dy ditë më parë, ku u ekzekutua me armë zjarri Zef Guri, 73 vjeç, si dhe u plagosur i biri, Gjin Guri.
Lajmin e konfirmoi këtë të premte kreu i Drejtorisë Vendore të Policisë Shkodër Ervin Hodaj, në një konferencë për shtyp.
Hodaj tha se nga hetimet e deritanishme, dyshohet se autor i kësaj ngjarjeje është Gjovalin Guri, i cili është shpallur në kërkim nga DVP Shkodër edhe për vepra të tjera penale.
Sipas tij, motivet e vrasjes dyshohet të jenë konfliktet dhe kanosjet e vazhdueshme mes palëve, për shkak të “zaptimit dhe shfrytëzimit të hapësirave dhe sipërfaqeve pyjore në zonë”.
Hodaj bëri me dije se autori është lidhje familjare me viktimën dhe të plagosurin.
“Janë lidhje familjare që kanë pasur konflikte edhe të mëparshme. I dëmtuari është person me precedentë të theksuar kriminalë dhe të gjitha këto ngjarje po i analizojmë për të arritur në dokumentimin e plotë të ngjarjes, së plagosjes dhe vrasjes së babait të tij”, tha drejtori i policisë.
Për kapjen e të kërkuarit, shtoi, janë angazhuar strukturat e Drejtorisë Vendore të Policisë Shkodër, Reparti Special “RENEA” dhe Njësia Alpine, ndërsa aktualisht vijojnë kontrollet në zonat e thella të Dukagjinit.
Krimi ndodhi rreth orës 18:20, në aksin rrugor Kir-mali i Shoshit. Zef Guri u vra me armë zjarri, ndërsa djali i tij Gjin Guri u plagos rëndë. Të dy po udhëtonin me një kamionçinë në drejtim të Shkodrës kur u qëlluan me armë zjarri.
