Për disa orë kanë qëndruar në Drejtorinë Vendore të Lezhës anëtarë të familjes Reçi nga Mirdita, ku u janë përgjigjur pyetjeve me interes për hetimin, mbi atentatin e regjistruar mëngjesin e së martës në qendër të Rrëshenit, ku u ekzekutua me breshëri kallashnikovi 59-vjeçari Martin Bardhi dhe u plagosën Ilir Bardhoku, Olti Gjini dhe Indrit Bardhi (djali i xhaxhait të viktimës).
Në cilësinë e personave që mund të kenë dijeni për shkak edhe të dyshime që ekzistonin lidhur me konfliktin e njohur mes dy familjeve, ata kanë dëshmuar para hetuesve se nuk kanë asnjë lidhje me ngjarjen.
“Mund të hapni kamerat apo të pyesni dëshmitarët për të provuar deklarimet tona se ku kemi qenë para, gjatë dhe pas momentit të ngjarjes. Nuk kemi lidhje me ngjarjen, konflikti i mëhershëm është referuar në organet përkatëse dhe janë marrë ato me rastin” – raporton Ora News, se kanë dëshmuar anëtarë të familjes Reçi.
Kur kanë kaluar 3 ditë nga atentati, ende nuk ka asnjë gjurmë të autorëve, teksa po punohet me vëzhgimin e kamerave të sigurisë për të gjurmuar lëvizjet e tyre.
Dyshohet se dy persona kanë qenë në automjetin nga i cili qëlluan duke vrarë Martin Bardhin e plagosur tre të tjerë.
Skena është regjistruar përballë një kamere sigurie të lokalit të vetë viktimës, por autorët kanë qenë të maskuar duke pamundësuar identifikimin.
Dëshmitë e familjarëve të viktimës nga ana tjetër nuk kanë dhënë ndonjë indicie të fortë për hetimin, pasi burime nga Policia e Lezhës thonë se nuk ia kanë drejtuar gishtin e akuzës dikujt veçanërisht.
