Gjykata e Posaçme dha këtë të Martë vendimet për të pandehurit e dosjes së inceneratorit të Fierit. Për disa prej tyre u dhanë vendime më të lehta se ç’kishte kërkuar prokuroria.
Me 10 vite burgim është dënuar ish-ministri i Mjedisit Lefter Koka, që për shkak të gjykimit të shkurtuar ulet në 6 vite e 8 muaj burgim. Koka u shpall fajtor për të treja akuzat, “Shpërdorimi i detyrës”, “Korrupsioni pasiv i funksionarëve të lartë shtetërore ose i të zgjedhurve vendorë” dhe “Pastrimi i produkteve të veprës penale ose veprimtarisë kriminale”, ndërsa gjykata i hoqi të drejtën për funksione publike për pesë vjet.
Alqi Bllako është dënuar me 4 vite burg, që për shkak të gjykimit të shkurtuar zbret në 2,8 vite. Prokuroria ndërkohë kishte kërkuar 4.8 vite burgim. Bllako u shpall i pafajshëm për akuzën “shpërdorim detyre të funksionarit”, por rikualifikohet vepra në “shpërdorim detyre të nëpunësit”.
Klodian Zoto, që sipas SPAK cilësohet një prej dy pronarëve faktikë të kompanive koncesionare të 3 inceneratorëve është dënuar me 12 vite burgim që zbret në 8 falë gjykimit të shkurtuar. Zoto u shpall i pafajshëm për akuzat e “korrupsionit aktiv” dhe u dënua për “korrupsion pasiv”, “skema mashtruese”, “pastrim parash”.
Administratori i Inceneratorit të Fierit, Loran Dusha u shpall i pafajshëm për “korrupsion aktiv”, por fajtor për “pastrim parash” dhe dënohet me 7 vjet që në aplikim të gjykimit të shkurtuar zbret në 4 vite e tetë muaj. Prokuroria kishte kërkuar 5 vite e 4 muaj burgim.
Anëtari i komisionit të dhënies së koncesionit, Florian Muçaj u dënua me 3 vite burg, me gjykim të shkurtuar shkon në 2 vite burg. Ai lirohet burgu, pasi i ka mbaruar dënimi.
Anëtari i komisionit të dhënies së koncesionit, Erjon Murataj u dënua me 3 vite burg, përfundimisht do të vuajë 2 vite burg.
Anëtari i komisionit të dhënies së koncesionit, Azem Shatëri u dënua me 3 vite burg, me gjykim të shkurtuar, shkon në 2 vite burg. Ai lirohet burgu, pasi i ka mbaruar dënimi.
Arbër Denizi, administrator i PIVOT-04, dënohet me 7 vite burg, me gjykim të shkurtuar shkon në 4 vite e 8 muaj burg.
Ish-zyrtari i ministrisë së Mjedisit, Pëllumb Abeshi dënohet me 3 vjet e 6 muaj që në aplikim të gjykimit të shkurtuar zbret në 2 vjet e tetë muaj. Në përfundim pezullohet dënimi dhe vihet në shërbim provë për katër vjet.
Regan Merdani, Administrator i “Froggysh.p.k” 3 vite burg, por gjykata vendosi pezullimin e dënimit dhe konvertimin në shërbim prove.
Administratori i “Itneg sh.p.k” Gentian Zifla,u dënua me 3 vite burg, por gjykata vendosi pezullimin e dënimit dhe konvertimin në shërbim prove.
Anëtarja e komisionit të dhënies së koncesionit, Sabika Cenomeri u shpall fajtore për shpërdorim detyre dënohet me tre vjet që në aplikim të gjykimit të shkurtuar zbret në 2 vjet. Në fund u urdhërua pezullimi i dënimit dhe u vendos shërbim prove për katër vjet.
Mbikëqyrësi i punimeve të inceneratorit, Arben Dervishaj, administratori i kompanisë J.P.Y Juri Ymeraj dhe Arjola Kodra u shpallën të pafajshëm për të gjitha akuzat.
Edhe shoqëria ITS dhe kompanitë e tjera u shpallën të pafajshme, ndërsa u vendos heqja e sekuestros për shoqërinë.
Sakaq GJKKO vendosi konfiskim të pjesshëm të vetëm dy pasurive të Lefter Kokës dhe urdhëroi lirimin e të tjerave.
Sipas SPAK, për inceneratorin e Fierit u paguan 4 milionë euro për punë që nuk u kryen asnjëherë, ndërsa dëmi i shkaktuar në buxhetin e shtetit është vlerësuar në 60 milionë lekë.
