Goli Rafael Leaos mjaftoi për t’i dhuruar Milanit tri pikët kundër Hellas Verona. Kuqezinjtë u rikthyen te fitorja pas humbjes në derbin me Interin dhe barazimit ndaj Newcastle në Champions League.
Arrigo Sacchi, ish-trajneri legjendar i Milanit, analizoi situatën e skuadrës së Stefano Piolit në një prononcim për GDS, ku ndër të tjera tha:
“Leao shënoi një gol të bukur, por sot Milani ekziston mbi të gjitha prej portugezit. Dhe ky është një limit i kuqezinjve.
Si janë lojtarët e Milanit? A janë ato funksionale për projektin e trajnerit? Shpresoj që po, shpresoj shumë që Pioli i ka zgjedhur sipas karakteristikave teknike dhe njerëzore.
Por ka një problem. Skuadra e Piolit nuk është ende një kolektiv”, deklaroi Sacchi në lidhje me 19 herë kampionët e Italisë.
Që këtë sezon synojnë fitimin e titullit, që do të sillte edhe yllin e dytë në fanellë. Milani numëron 12 pikë pas 5 ndeshjeve të para në Serie A.
