Një qen endacak u hodh në një lumë me krokodilë dhe fati i tij mund të hamendësohej lehtë. Megjithatë, skenari rezultoi tërësisht tjetër. Dy nga krokodilët e shtynë katërputroshin i cili, ishte hedhur në lumë për t’i shpëtuar një tufe qensh të egër.
Ekspertët thonë se në vend që ta gllabëronin qenin endacak, krokodilët e “udhëzuan” larg nga vendi ku e prisnin tufa e qenve që lehnin në bregun e lumit në shtetin Maharashtra, në Indinë perëndimore.
“Këta krokodilë në fakt po e preknin qenin me hundën e tyre dhe po e shtynin të lëvizte më tej për një ngjitje të sigurt në breg dhe të shpëtonte”, shkruan shkencëtarët në një raport të botuar në Journal of Threatened Taxa. “Krokodilët mund ta kishin gllabëruar lehtësisht qenin, megjithatë asnjëri prej tyre nuk e sulmoi dhe përkundrazi zgjodhën që ta shtynin drejt bregut, dhe kjo nënkupton që nxitja e urisë mungonte”.
Shkencëtarët nuk janë ende të sigurt se përse krokodilët nuk e panë incidentin si mundësi për të ngrënë qenin.
Por ata thonë se krokodilët e këtij lloji, nuk janë gjithmonë agresivë teksa shtojnë se inteligjenca e tyre emocionale mund të jetë shfaqur në këtë rast.
“Empatia emocionale”, e cila lejon një specie “të përjetojë ndjenja për një tjetër”, nuk është hetuar në këta krokodilë,” thanë shkencëtarët.
Krokodilët e kënetës gjenden më së shpeshti në Indi dhe meshkujt e rritur mund të arrijnë deri në 5.4 metra gjatësi.
