Personi që shihni në foton e mësipërme është 28-vjeçari shqiptar Aurel Kurti, i cili u arrestua nga policia greke, pasi për rreth dy vite torturonte bashkëshorten e tij, po ashtu shqiptare, Dafina Kurti, 22 vjeçe, dhe fëmijën e tyre 2.5 vjeç, për shkak se kishte lindur vajzë. Gjithashtu, ai e mbante bashkëshorten të izoluar në banesë, larg fqinjëve të tyre.
Ngjarja ka ndodhur në një fshat te Volosit, teksa makthi për shqiptaren ka përfunduar mbrëmjen e të enjtes, kur banorët e lagjes u mobilizuan për ta shpëtuar pasi dëgjuan britmat e saj.
Fqinjët kanë shkuar tek banesa e çiftit duke goditur dyert, si edhe kanë njoftuar policinë. 28-vjeçari ka tentuar të dalë nga dera e pasme për të shpëtuar, por fqinjët e kapën dhe e ndaluan. Kur policia hyri brenda banesës gjetën nënën e re e cila kishte përqafuar fëmijën e saj dhe ishte e mbuluar me gjak me shenja mavijosje në qafë, pasi bashkëshorti kishte tentuar ta mbyste.
Pasi morën mjekim në spital, gruaja e re dhe fëmija u dërguan në një banesë sociale dhe u morën në mbrojtje prej autoriteteve, ndërsa ndaj autorit u ngritën akuza të rënda si plagosje e rëndë me dashje, pengmarrje, dhunë në familje, dhunë ndaj të miturve etj, të cilat do ti kushtojnë atij disa vite burg.
Dhuna ndaj Dafina Kurtit filloi që kur u mësua gjinia e bebit, pasi Aurel Kurti nuk donte vajzë. Kur lindi fëmija, nëna dhe foshnja jetuan për pesë muaj me grila të mbyllura dhe pa rrezet e diellit. Rrahjet ishin të përditshme dhe 28-vjeçari nuk e lejonte nënën të shkonte te mjeku për vaksinimin e fëmijës dhe as të thërriste mjekun në shtëpi.
“Jam dhunuar, i kam shpëtuar shumë herë vdekjes. Ai më kërcënoi se nëse ikja në Shqipëri do të vinte dhe do të vriste prindërit e mi”, ka treguar në dëshminë e saj, 22-vjeçarja shqiptare.
Dafina Kurti u martua me detyrim nga prindërit e saj në moshën 18-vjeçare dhe u zhvendos së bashku me partnerin nga Shqipëria në Volos të Greqisë në vitin 2021, por ky i fundit nuk e lejoi kurrë të mësonte greqisht, apo të kishte kontakte me njerëzit.
