Gjykata e Tiranës ka lënë në masën e sigurisë “arrest me burg” 42-vjeçarin Klered Bozhanaj, i cili tre ditë më parë plagosi me armë zjarri pistoletë efektivin e “Shqiponjave” Edlir Alleshi, pasi ky i fundit ishte vënë në ndjekje të tij.
Mësohet se gjatë seancës së sotme, ai ka deklaruar “jam amerikan dhe jo shqiptar”, duke shfaqur paqëndrueshmëri mendore edhe me togat e zeza. Ndërsa para Policisë, ai ka deklaruar ““Jam iluminati”, “Jam komandant në Pentagon”.
Avokati i tij i mbrojtjes Roland Llalla, kërkoi ekspertim të gjendjes mendore dhe shtrim të detyruar spitalor, por gjykata caktoi arrest në burg.
Deklarimet e tij kanë shtuar edhe më tej dyshimet se 42-vjeçari mund të ketë probleme të shëndetit mendor. Grupi i hetimit ka kërkuar ekspertizë të plotë mjekoligjore e cila do të saktësojë nëse i akuzuari vuan nga probleme mendore .
Ngjarja ndodhi mbrëmjen e 20 shtatorit, ku Klered Bozhanaj plagosi me dy plumba në bark efektivin e “Shqiponjave” në një pallat në “Kinostudio”, në rrugën “Hysen Xhura” në Tiranë. Efektivi iu nënshtrua një ndërhyrje kirurgjikle dhe tani është jashtë rrezikut për jetën.
