Një 25-vjeçar shqiptar ka humbur jetën tragjikisht në punë mëngjesin e kësaj të premte në Greqi. Mediat vendase raportojnë se ai ka humbur jetën, teksa ka qenë duke punuar në një kantier ku po kryheshin punime për rrjetin e kanalizimeve.
Ngjarja ka ndodhur rreth orës 10:15 në Rema Rebelia (Rruga e Pavarësisë Kombëtare Agios Konstantinos), konkretisht në kryqëzimin me rrugën 3 Shtatori.
Raportohet se i riu shqiptar është goditur nga një ekskavator dhe ka rënë në gropë, por ende nuk është e konfirmuar. Megjithatë, rrethanat mbeten të paqarta ndërkohë që hetimet nga autoritetet policore për rrethanat e sakta të ngjarjes janë në zhvillim e sipër. Në kantier ka pasur shumë persona që pritet të dëshmojnë.
Menjëherë në vendngjarje ka mbërritur autoambulanca e cila ka transportuar punonjësin e plagosur rëndë në spitalin e Agrinit, ku fatkeqësisht nuk ka arritur dot t’u mbijetojë plagëve të marra dhe ka ndërruar jetë. Ende nuk dihet identiteti i viktimës. Raportohet se ai e kishte ditën e parë në punë.
Për shkaqet e sakta të vdekjes së tij, është urdhëruar autopsia në Mjekësinë Ligjore të Patrës.
