Gjykata e Posaçme ka pranuar kërkesën e SPAK, duke kaluar për gjykim dosjen Beleri. Fituesi i zgjedhjeve të 14 majit do gjykohet për akuzën e korrupsionit zgjedhor. Gjithashtu për këtë çështje i pandehur është marre edhe Pandeli Kokaveshi, i cili do gjykohet nën masën e detyrimit për t’u paraqitur.
Gjatë seancës paraprake, avokatët e Belerit kërkuan pushimin e çështjes dhe mos marrjen parasysh të provave të mbledhura, duke i konsideruar si të paligjshme. Por kjo kërkesë e tyre u refuzua nga Gjykata.
Përpara nisjes së seancës prezent ishte edhe deputeti Vangjel Dule, i cili u shpreh se janë shkelur ligjet ndërkombëtare të të drejtave të njeriut, për prezumimin e pafajësisë dhe se Beleri duhej liruar për të bërë betimin.
Fredi Beleri dhe Pandeli Kokaveshi u arrestuan 2 ditë para zgjedhjeve lokale të 14 majit, pas një hetimi të nisur nga Prokuroria e Vlorës në datën 8 maj, me dyshimet se shtabi elektoral i kandidatit të koalicionit “Bashkë Fitojmë” po shpërndante para në këmbim të votave.
Beleri ka mohuar akuzat dhe e ka konsideruar hetimin ndaj tij sulm politik. Për arrestimin e tij ka reaguar disa herë Athina zyrtare, por Tirana ka reaguar, duke theksuar se në Shqipëri për raste të tilla vendos drejtësia e pavarur.
