Administratorja e një qendre masazhi në Tiranë ku ushtrohej prostitucion është ndaluar nga policia, ndërsa pronari është shpallur në kërkim. Policia thotë se hetimet për ta kanë nisur në muajin shkurt ndërsa reagimi vjen një ditë pasi emisioni “Fiks Fare” publikoi pamje që zbuluan se qendra e mazhit ishte një vend ku ushtrohej aktiviteti i prostitucionit.
“Specialistët e Seksionit për Hetimin e Trafiqeve të DVP Tiranë, në vijim të procedimit penal të regjistruar në muajin shkurt të këtij viti, si dhe pas publikimit të pamjeve filmike, bënë ndalimin e shtetases E.O., 30 vjeçe (administratore e një qendre masazhesh), si dhe shpallën në kërkim shtetasin O. Rr., 36 vjeç, banues në Tiranë (pronari i qendrës së masazheve)”, thuhet në njoftimin e bluve.
Në lidhje me rastet e tjera të transmetuara, shton policia, janë kryer veprimet procedurale për subjektet e përmendura në video, konkretisht: Më datë 10.01.2023, janë arrestuar 2 punonjëse të një qendre masazhesh në rrugën “Teodor Keko”; Më datë 27.03.2023, janë arrestuar 6 shtetas (administratori, 1 klient dhe 4 punonjëse), në një qendër masazhesh në rrugën “Teodor Keko”.
Po ashtu, bën me dije se më datë 19.07.2023, është arrestuar 1 punonjëse e qendrës së masazheve dhe ka nisur procedimi në gjendje të lirë për 3 shtetase të tjera, ndërsa në vijim të veprimeve procedurale për këtë qendër masazhesh, u bë ndalimi i E.O. dhe shpallja në kërkim e O.Rr..
Gjatë kamerës së fshehtë të transmetuar dje nga emisioni, një nga vajzat që punonin në qendrën e masazheve deklaroi se pronarët paguajnë nga 10 mijë deri në 20 mijë euro muaj te policia, në mënyrë që efektivët mos të vepronin duke toleruar veprimtarinë e kësi qendër dhe të tjerave që sipas vajzave, pronarët kishin në Tiranë.
Lexo edhe:
