Çmimet e ushqimeve bazë dhe pijeve joalkoolike kanë rënduar xhepin e shqiptarëve në muajin shkurt.
Statistikat zyrtare të INSTAT tregojnë se inflacioni për muajin shkurt shënoi 1, 6 %.
Sipas INSTAT grupi që ka ndikuar më shumë në këtë rritje ka qenë “ushqimet dhe pijet joalkoolike” që janë rritur me 3,0 %. Gjithashtu në rritjen e përgjithshme të çmimeve ka ndikuar edhe rritja në grupet “Veshje dhe këpucë” me 2,5 %, “Transport” me 2,4 %, “Qira, ujë, lëndë djegëse dhe energji” me 2,1 %, “Pije alkoolike dhe duhan” me 1,4 %, “Shërbimi arsimor” dhe “Komunikimi” me 0,9 % secili, etj.
Por shqiptarët kanë paguar më pak për “Mobilje shtëpie dhe mirëmbajtje“, çmimet e të cilave sipas INSTAT u ulën me 0,7 %. Gjithashtu, ulje ka shënuar edhe grupi “Hotele, kafene dhe restorante” me 0,1 %.
Në muajin Shkurt 2018, ndryshimi mujor i matur nga Indeksi i Harmonizuar i Çmimeve të Konsumit është 1,0 %.
Këtë ndryshim INSTAT e argumenton me ndikimin e rritjes së çmimeve të grupit “Ushqime dhe pije joalkoolike” me 2,5 %, pasuar nga grupet “Pije alkoolike dhe duhan” dhe “Transport” me 0,3 % secili, etj. Ndërsa, çmimet e grupeve “Veshje dhe këpucë” dhe “Hotele, kafene dhe restorante“ u ulën me 0,3 % secili.
