Të gjithë operatorët që importojnë plehra kimike për sektorin bujqësor pa kriter do të ndëshkohen.
Autoriteti Kombëtar i Ushqimit nisur nga shqetësimet e fermerëve, në lidhje me vendosjen në treg të plehrave të përdorimit për bujqësinë me cilësi të ulët, të paregjistruara nga Komisioni i Regjistrimit dhe pa etiketimin në gjuhën shqipe, ka intensifikuar kontrollet.
Specialistët përgjegjës të AKU po kontrollojnë në të gjitha Pikat e Kalimit Kufitar si dhe në terren, me qëllim për të identifikuar shkeljet dhe ndëshkuar sipas rastit, në zbatim te legjislacionit në fuqi.
Sipas njoftimit të Autoriteti Kombëtar të Ushqimit, ky institucion i është drejtuar me shkresë zyrtare të dedikuar 64 operatorëve të biznesit të cilat importojnë plehra të përdorimit në bujqësi, në territorin e Republikës se Shqipërisë, nëpërmjet së cilës ju është janë vënë në vëmendje kërkesat rregullatore, si kusht i pakalueshëm i lejimit te importit ose jo të tyre:
1- Plehra të cilat nuk kane emërtimin “EC FERTILIZER”, lejohen të importohen ne vendin tone vetëm nëse janë te regjistruara nga Komisioni i Regjistrimit i cili funksionon ne MBZHR.
2- Te gjitha tipet e plehrave te përdorimit për bujqësinë qe lejohen te importohen ne vendin tonëduhet të jenë të pajisura me dokumentacionin shoqërues si certifikatën e origjinës, certifikatën e analizës, si dhe etiketën në gjuhën shqipe – e cila duhet të jetë e stampuar në ambalazhin bazë.
Autoriteti Kombëtar i Ushqimit u kërkon fermerëve, që të mos blejnë plehra të përdorimit për bimësinë, të cilat janë të paregjistruara, të paçertifikuara, pa etiketimin në gjuhën shqipe dhe të pajisen në blerje me kupon tatimor, si një element me shumë rëndësi që tregon se ky subjekt i nënshtrohet kontrolleve periodike nga AKU.
