Personi që shihni në foton e mësipërme është 35-vjeçarja Adriana Prendi, e cila humbi jetën në aksidentin tragjik të regjistruar mëngjesin e kësaj të hëne në aksin Krane-Qafëbotë, në dalje të Konispolit.
Mësohet se ajo ishte nënë e tre fëmijëve, teksa ishte kthyer në atdhe, pasi mbrëmjen e djeshme ka martuar vëllain e saj. Pas dasmës së të vëllait, 35-vjeçarja bashkë me bashkëshortin Gëzim Prendi, i cili drejtonte mjetin, ishin duke u kthyer drejt Greqisë ku edhe jetonin, por u përfshinë në aksident.
Nga aksidenti mbeti iplagosur dhe një pasagjer, shtetasi Emanuel Gera, 37 vjeç, i cili ndodhet jashtë rrezikut për jetën. Ngjarja ka ndodhur rreth orës 05:50, teksa Gëzim Prendi, ka humbur kontrollin e mjetit dhe ka dalë nga rruga.
Njoftimi:
Rreth orës, 05:50, të mëngjesit të sotëm në aksin rrugor Krane-Qafëbotë, në dalje të Konispolit, automjeti tip “Volksëagen”, me drejtues shtetasin G. P., 43 vjeç, ka dalë nga rruga, dhe për pasojë ka humbur jetën pasagjerja, shtetasja A. P., 35 vjeçe, bashkëshortja e 43-vjeçarit, banuese në Konispol.
Si dhe ka pësuar dëmtime pasagjeri tjetër në këtë automjet, shtetasi E. G., 37 vjeç, i cili ndodhet jashtë rrezikut për jetën.
Grupi hetimor ka shkuar menjëherë në vendngjarje dhe po punon për sqarimin dhe dokumentimin e rrethanave dhe shkakut të aksidentit, ku paraprakisht dyshohet se drejtuesi i automjetit ka humbur kontrollin mbi drejtimin e automjetit dhe për pasojë automjeti ka dalë nga rruga.
