Refuzimi i Presidentit të Republikës, Bajram Begaj, për të pajisur me pasaportë shqiptare futbollistët Enis Asani, Arlind Rexhepi dhe Edon Pruti ka bërë që lista e kombëtares U-21 të pësojë ndryshime.
Trajneri i Shqipërisë U-21, Alban Bushi shpalli tre ditë më parë edhe listën me 23 emrat e lojtarëve të thirrur për këto dy sfida të rëndësishme, të cilët do t’i zhvillojnë përgatitjet e tyre në Stamboll të Turqisë por zhvillimet e fundit kanë ndryshuar planet.
Tashmë departamenti i Komunikimit në FSHF bën me dije se, skuadrës do t’i bashkohen edhe dy futbollistë të tjerë, Elmando Gjini dhe Rei Pecani, në mënyrë që trajneri Bushi të ketë në dispozicion një grup të plotë.
Gjithashtu, bëhet me dije se me ekipin nuk do të udhëtojë mesfushori Leandro Frroku për shkak të një dëmtimi.
Ndeshja e parë e Shqipërisë U-21 do të jetë ajo kundër Armenisë më 8 shtator, në ora 19:00, ndërsa takimi tjetër do të jetë ai kundër Rumanisë në ‘Elbasan Arena’, më 12 shtator në ora 18:30.
