Me statusin e miratuar ditën e sotme nga Këshilli Kombëtar i partisë së vulës, Gazment Bardhi nuk është më kryetar grupi. Mirëpo, ky i fundit nuk i ka kursyer një përgjigje për Bashën, dikur aleatë, e sot kundërshtarë. Bardhi ka zgjedhur që t’i përgjigjet Bashës me një citim nga Fjodor Dostojevski.
“Të jetosh në deziluzion, është fatkeqësi personale. Të mashtrosh me vetëdije të tjerët dhe mbi të gjitha veten, për të disatën herë, është e pafalshme”, shkruan Bardhi në rrjetet sociale.
Në nenin 48, pika 3 të statutit të ndryshuar, propozohet që kur partia e vulës të jetë në opozitë, kryetari i grupit Parlamentar të jetë vetë kryetari i Partisë. Pra Basha, “i ka bërë dalje” Gazment Bardhit, i cili i ka dalë kundër dhe kompetencat ia ka kaluar vetes.
“Kur PDSH nuk është shumicë qeverisëse, Kryetari i Partisë është edhe Kryetar i Grupit Parlamentar. Kryetari i Partisë, me autorizim të tij, mund të caktojë një prej Nënkryetarëve të Partisë për të drejtuar Grupin Parlamentar”, thuhet në draft.
