Shefi i kirurgjisë në QSUT dhe njëkohësisht rektori i Universitetit të Mjekësisë, Arben Gjata është paraqitur ditën e sotme sërish në SPAK për t’u marrë në pyetje nga dy prokurorët e SPAK, Ened Nakuçi dhe Edvin Kondili në lidhje me rolin e tij në skandalin e kontratës të partneritetit publik privat për sterilizim e instrumenteve kirurgjikale.
Burime bëjnë me dije se në pyetje ditën e sotme do të merret dhe Genc Byrazeri, i cili ka qenë anëtar i Komisionit të tenderit të sterilizimit. Si për Arben Gjatë, ashtu edhe për Byrazrin, GJKKO ka caktuar masat e sigurisë “detyrim paraqitje”.
Në lidhje me abuzimet me tenderin e sterilizimit, SPAK ka arrestuar ish-zëvendësministrin e Shëndetësisë, Klodian Rjepaj, si dhe biznesmenin që ka fituar koncesionin Ilir Rrapaj. Si dhe ka caktuar masat “arrest shtëpie” për: Saimir Kadiu, Drejtor Ekonomik, dhe Marsela Serjanaj, Drejtoreshë Juridike. Si dhe masat “detyrim paraqitje” edhe për Pertef Mersini dhe Naile Ajazi.
Shtatë zyrtarët akuzohen për veprat penale “Falsifikim i dokumentave” dhe “Shpërdorimi i detyrës”, të dyja të kryera në bashkëpunim. Ndërsa, biznesmeni Ilir Rrapaj akuzohet për veprën penale “Mashtrimi”, me pasoja të rënda.
GjKKO i kishte firmosur 8 urdhër-arrestet e lëshuara nga prokurorët Ened Nakuçi dhe Edvin Kondili që më 23 qershor 2023, por u ekzekutuan dy muaj më pas, 16 – 17 gusht 2023. Rrapaj u prit që të hynte në Shqipëri nga Italia dhe u arrestua në Dhërmi ku kishte ardhur me pushime.
E konfirmuar nga prokurorët e SPAK, nën hetim për këtë çështje janë dhe ish-ministri i Shëndetësisë, Ilir Beqja me ish-ministrin e Financave, Shkëlqim Cani, por çështja për ta është ndarë më vete. Të dy ata kanë dëshmuar në SPAK në lidhje me këtë çështje, bashkë me ish-ministren e Ekonomisë, Anila Denajn,.
Pronari i kompaninë me seli në Prishtinë, “Investital LLC”, Ilir Rrapaj, zotëron 40 për qind të aksioneve të subjektit “SaniService” i cili në vitin 2015, fitoi koncesionin për “ofrimin e shërbimeve të integruara për setin e personalizuar të instrumenteve kirurgjikale, furnizimin me material mjekësor steril njëpërdorimësh në sallat kirurgjikale, si dhe trajtimin e mbetjeve biologjike dhe dezinfektimin e sallave kirurgjikale”, me afat 10-vjeçar.
Koncesioni i sterilizimit të pajisjeve kirurgjikale është një nga katër projektet e Partneritetit Publik Privat të qeverisë “Rama” në sektorin e shëndetësisë, i cili i ka kushtuar taksapaguesve shqiptarë rreth 7.9 miliardë lekë [76 milionë euro] deri në fund të vitit 2022. Ajo është një ndër dosjet e para të denoncuara në Prokurorinë e Posaçme që prej vitit 2019, ndërkohë që vendimarrja vjen pas më shumë se katër vitesh hetime.
Nga të dhënat e publikuara në media, biznesmeni Ilir Rrapaj, i cili ka fituar koncesioin, rezulton mik me Ilir Beqajn, i cili drejtonte ministrinë e Shëndetësisë, në kohën kur është dhënë ky koncesion. Po ashtu, Ilir Rrapaj rezulton se ka qenë shok klase në shkollë dhe me ish-zv.ministrin Klodjan Rjepaj, tashmë i arrestuar nga SPAK.
Në vitin e parë të kontratës nga buxheti i shtetit janë paguar 17 mln euro, nga 12 që parashikonte kontrata. Koncesioni i sterilizimit është në hetim prej 3 vitesh.
Një pikëpyetje e madhe në lidhje me aferën e sterilizimit, përveç kostos së lartë, ka qenë kompania fituese me pronar emigrantin shqiptar në Itali, Ilir Rrapaj.
Në vitin 2000 ai kishte themeluar në Peruxhia një kompani me kapital të vogël prej 1500 eurosh, por pas fitores së Partisë Socialiste në zgjedhjet e qershorit 2013, biznesmeni me origjinë nga fshati Rexhepaj i Vlorës u kthye në Shqipëri, ku sipas BIRN, vendosi kontakte me kreun e Shëndetësisë, Ilir Beqaj.
Fituesi i koncesionit së bashku me disa biznesmenë italianë, kanë pasur disa takime e kontakte me titullarin e shëndetësisë.
Pas kthimit në Shqipëri, nëpërmjet kompanisë së tij Investital LLC, me kapital 1000 euro të regjistruar në Prishtinë me vetëm një të punësuar, Rrapaj zotëroi 40 % të aksioneve në një bashkim kompanish, të cilat fituan tenderin për sterilizimin e pajisjeve kirurgjikale.
