Partizani ka kryer dje pasdite stërvitjen e radhës në kuadër të përgatitjeve për ndeshjen e së enjtes ndaj Astanës.
Në dispozicion të trajnerit Zekiç kanë qenë të gjithë lojtarët, me kroatin, që po skicon detajet e fundit të formacionit dhe asaj që do të bëjë në fushë skuadra, ku misioni është përmbysja e humbjes minimale në sfidën e parë. Partizani do të synojë që minimalisht ta çojë këtë ndeshje në shtesë, për të shpresuar më pas deri në fund.
I vetmi shqetësim për të kuqtë deri më tani raportohet të jetë Kristian Mba. Sulmuesi nigerian ka pësuar një dëmtim në muskujt e barkut dhe vijon të mos jetë në gjendje të stërvitet normalisht me ekipin. Pavarësisht se rikuperimi i tij po përparon, te Partizani nuk janë ende të qartë nëse ai do të jetë në fushë apo jo.
Me siguri për gatishmërinë e Mbasë do të duhet të pritet deri në orët e fundit. Problemi në këtë çështje është rreziku i përshkallëzimit të dëmtimit, me stafin, që ka mjaft mëdyshje, pasi pavarësisht rëndësisë së kësaj ndeshjeje, në vijim nis kampionati dhe Mba është një element shumë i nevojshëm. Shanset janë që nigeriani ta nisë nga stoli.
Gjakovari luajti vetëm 23 minuta ndaj Astanës në ndeshjen e parë dhe krijoi dyshime të forta për një tërheqje muskulore, që do ta mbante gjatë jashtë fushave. Megjithatë, pas vizitave ka rezultuar vetëm një kontraktim i momentit për shkak të ngarkesave.
Në dy ditët e fundit mësohet se Grezda është stërvitur normalisht dhe është i gatshëm për Zekiçin. Ky është çlirim për trajnerin, pasi opsionet në sulm janë reduktuar së fundmi.
Sa i përket formacionit, Zekiç na ka mësuar se ndryshimet nuk i ka shumë në qejf. Në mbrojtje kthehet Atanaskoski, ndërkohë që Maget pritet titullar pas paraqitjes së mirë në ndeshjen e parë. Në rast se Mba ia del të rikuperohet, me shumë mundësi do të këmbente vendet me Grezdën, që ende nuk ka ardhur në formën maksimale.
Formacioni i mundshem i Partizanit:
4-3-2-1: Qirko, Hadroj, Sota, Koçijan, Atanaskovski, Rrapaj, Mehmeti, Maget (Murataj), Taipi, Grezda (Mba), Cara
