Kryeministri Edi Rama vijon të mbrojë koncesionin e sterilizimit, për të cilin është pas hekurave ish-zv.ministri i Shëndetësisë, Klodian Rrjepaj, biznesmeni Ilir Rrapaj, 6 anëtarë të komisionit të dhënies së koncesionit, ndërsa vijojë hetimet për ish-ministrin Ilir Beqaj.
Në faqen e tij në FB, Rama bëri një vizitë në një nga qendrat ku bëhet sterilizimi te spitali “Shefqet Ndroqi”, duke u shprehur se koncesioni solli “standard krejt të ri sigurie për ndërhyrjet operatore”
Ai rreket të minimizojë faktin se koncesioni i sterilizimit është faktuar nga SPAK një aferë korruptive.
“Hetimi i SPAK-ut për abuzime të mundshme në procesin e ndërtimit të këtij Partneriteti Publik Privat, nuk e cënon aspak suksesin e prekshëm të kësaj nisme madhore të qeverisë shqiptare për Rilindjen e Shëndetësisë, por siguron që askush të mos mbetet i pandëshkuar nëse ia bën me hile shtetit dhe popullit shqiptar, duke nxjerrë përfitime vetjake të paligjshme gjatë kryerjes së detyrës në punën për qëllimin e përbashkët”, shkruan Rama.
