Për shkak të situatës së rënduar nga zjarri në fushën e mbetjeve pranë inceneratorit të Elbasanit, në ndihmë të zjarrfikësve kanë shkuar edhe efektivë të Forcave të Armatosura.
Ministri i Mbrojtjes Niko Peleshi bën të ditur se 20 efektivë të FA dhe 5 mjete janë angazhuar për shuarjen e flakëve.
Kujtojmë se një zjarr ka përfshirë pikën e grumbullimit të plehrave, pranë inceneratorit të Elbasanit. Flakët janë përhapur me shpejtësi, ndërsa zjarrfikësit janë angazhuar për të shuar flakët.
Nuk dihen shkaqet që kanë shkaktuar rënien e zjarrit, ndërsa theksohet se fusha ruhet edhe me roje.
“Forcat e Armatosura iu përgjigjën menjëherë kërkesës së autoriteteve vendore të Elbasanit për të ndihmuar më vënien në kontroll të flakëve në vendgrumbullimin e mbetjeve urbane. 20 efektivë të BMEC-së dhe 5 mjete janë nisur krah forcave zjarrfikëse të Elbasanit për të frenuar përhapjen e zjarrit që favorizohet nga era dhe temperaturat e larta”, njofton ministri Peleshi.
