Kryeministri Edi Rama ka komentuar qëndrimin e tij lidhur më çështjen “Beleri” i cili së fundmi është kthyer në “mollë sherri” mes Greqisë dhe Shqipërisë.
Gjatë një komunikimi me gazetarët, Rama theksoi se asnjë ndërhyrje në sistemin e drejtësisë nuk do të merret parasysh nga qeveria.
Pavarësisht se Greqia ka kërcënuar integrimin e Shqipërisë në BE, Rama shfaqet i pa shqetësuar dhe nuk tërhiqet nga qëndrimet e tij ndaj Fredi Belertit.
“Qëndrimi ynë ka qenë, është dhe do të jetë që drejtësia duhet të bëjë detyrën e saj. Në këtë pikë asgjë nuk është më e rëndësishme se sa mbrojtja me të njëjtën mënyrë siç kemi vepruar në të gjitha rastet e tjera, e qetësisë së veprimtarisë së sistemit të ri të drejtësisë. Asnjë lloj interferencë ngado që të vijë, nuk do të gjejë përkrahje dhe mirëkuptimin tonë. Ne nuk ndërhyjmë në çështjet e drejtësisë dhe nuk i komentojmë organet e reja të drejtësisë. Kjo është e panegociueshme për forcën që qeveris sot. Të tjerët mund të bëjnë çfarë të dëshirojnë, ne jo.
Pesha e kësaj reforme (Reforma në Drejtësi) i kalon të gjitha peshat e reformave të tjera. Është e rëndë sepse lidhet drejtpërdrejt me lirinë e atyre që kanë pushtet. Mund ta humbasin lirinë nëse e shfrytëzojnë pushtetin për të cenuar të drejtat e publikuat apo individëve të tjerë. Unë mrekullohem kur dëgjoj që në vend se kjo të jetë një arsye e përbashkët për tu ndierë mirë që drejtësia më në fund, pas 100 vjetësh po vepron si e tillë, kthehet në një arsye për të bërë cic-mic, mjau-mjau jo po si ndiheni ju, jo po çfarë bëni ju. Unë ndihem shumë krenar për këtë që kemi bërë”, u përgjigj Rama.
Shqipëria dhe Athina zyrtare kanë pasur marrëdhënie të tensionuara kohët e fundit, pas arrestimit të kryebashkiakut të zgjedhur të Himarës, Fredi Beleri. Ky i fundit ndodhet në burg prej 12 majit me akuzën e blerjes së votave, ndërsa Athina kërkon lirimin e tij.
