Kryeministri i Kosovës, Albin Kurti, kërkoi njohjen e pavarësisë së vendit të tij gjatë takimit informal të Athinës.
“Në darkën e përbashkët që patëm unë theksova se anëtarësimi i Republikës së Kosovës në Bashkimin Evropian nuk ka alternativë. Që të gjitha shtetet që aspirojnë anëtarësimin në BE duhet të zbatojnë demokracinë, sundimin e ligjit, respektimin e të drejtave të njeriut dhe fqinjësinë e mirë dhe se për fqinjësi të mirë, demokratike e evropiane është e domosdoshme njohja reciproke, de-jure, e de-facto si dhe të drejtat e pakicave në mënyrë simetrike e sipas konventave evropiane“, u shpreh ai në një reagim.
Në mbledhjen e qeverisë në Prishtinë, Kurti nënvizoi se informoi pjesëmarrësit në eventin në Greqi lidhur me situatën në komunat veriore, me pohimin se atje praktikisht nuk ka më krizë.
“De-eskalimi në katër komunat në veri të vendit praktikisht ka ndodhur, ndërkohë që Kosova është duke e respektuar marrëveshjen e Bratisllavës. Në prag të Samitit të Berlinit në Tiranë në këtë tetor, takimi në Athinë me pjesëmarrjen e presidentit Zelensky i kontribuon bashkëpunimit rajonal dhe procesit të integrimit në Bashkimin Evropian. Për Kosovën, pjesëmarrja në Athinë dhe takimet e nivelit të lartë në pallatin Maximos përbëjnë edhe një hap tjetër drejt avancimit të marrëdhënieve ndërmjet Republikës së Kosovës dhe Greqisë.”
Kryeministri i Kosovës shtoi se gjatë takimeve bilaterale në Athinë, ka folur për ndikimin që ka Serbia në episodet e dhunës dhe trazirat në veri.
“Tani duhet parandaluar ri-eskalimi. Kur s’ka protesta të dhunshme të planifikuara, të organizuara nga Beogradi zyrtar, nuk ka eskalim në veriun e Kosovës.”
Aktualisht qeveria e Kosovës është në fazën e krijimit të kushteve ligjore për mbajtjen e referendumeve për largimin e kryetarëve shqiptarë nga komunat në veri, që më pas atje të organizohen edhe zgjedhjet e reja me pjesëmarrjen e serbëve.
