Edi Rama është i përjashtuari i tryezës që do të shtrojë Kyriakos Mitsotakis në pallatin kryeministror grek këtë të hënë, në orën 20:15.
Darka e liderëve të Ballkanit Perëndimor dhe kryeministrit grek, ku nuk do të mungojnë as Albin Kurti e Aleksandër Vuçic dhe ftesa e munguar për Ramën tregon qartë, rëndësinë që ka për Greqinë çështja e kryebashkiakut të zgjedhur të Himarës, Fredi Beleri.
Akujt e ftohtë që janë ngritur nga 12 maji, kur Beleri u vu në pranga, në raportin Rama-Mitsotakis po dalin në pah me rastin e darkës informale për 20-vjetorin e Samitit BE-Ballkani Perëndimor dhe “Deklaratës së Selanikut”.
Edhe pse Athina zyrtare ftoi Shqipërinë në rang presidencial, Bajram Begaj nuk u ngjit në lartësinë e detyrës, por zgjodhi që për të, të flisnin nga qeveria.
Lidhur me incidentin në nivel diplomatik, ka folur për mediat greke zëdhënësi i qeverisë helene, Pavlos Marinakis.
Ai ka komfirmuar atë që përflitet prej kohës për marrëdhëniet e tensionuara greko-shqiptare, duke thënë se ftesa e munguar për Ramën në darkën e liderëve të rajonit vjen si pasojë e qëndrimeve për çështjen e kryebashkiakut të Himarës, Fredi Belerit i cili ndodhet në burg si i akuzuar nga SPAK për blerje votash.
Zëdhënësi i qeverisë thekson se Shqipëria duhet të respektojë rregullat bazë të shtetit ligjor dhe se nga ana e Greqisë nuk do të ketë asnjë hap pas.
“Qeveria greke me një sërë ndërhyrjesh të kryeministrit dhe ministrit të Jashtëm, është e koordinuar me shtetin e së drejtës, jo vetëm pranë Fredi Belerit një kryetar bashkie i zgjedhur ligjërisht, i cili duhet të betohet. Shqipëria duhet të respektojë rregullat bazë të shtetit ligjor dhe ne nuk do të bëjmë asnjë hap pas për këtë”, ka thënë ai.
