Fluksi i shtuar i pushuesve që i drejtohen bregdetit të Jugut në fundjavë, por edhe ata që zgjedhin të ndalen në Korçë për “Festën e Birrës”, kanë rënduar trafikun në Elbasan.
Unaza e qytetit është një ndër më të ngarkuarat në periudha të caktuara të vitit për shkak të lëvizjes drejt juglindjes, dhe e tillë ka qenë edhe mëngjesin e sotëm.
Po ashtu mbetet problemati aksi në dalje të autostradës Tiranë-Elbasan, nga rreth rrotullimi i Bradasheshit.
Edhe pse shefi i Sektorit të Qarkullimit në Elbasan, Valentin Florini tha paraditen e sotme se janë angazhuar në 100% të kapaciteteve në terren për të lehtësuar lëvizjen e mjeteve, rradhë të gjatë janë krijuar pas orë 16:00.
Qytetarët ankohen për situatë të rënduar me trafikun në në aksin Bradashesh- Elbasan, duke u shprehur për mediat se kanë ngecur aty prej 30 minutash.
“Po bëhet gati ja gjysmë ore, 30 minuta”, tha një prej tyre, ndërsa një tjetër shofer e pasoi duke u shprehur: “Mos e pyet fare na ka çmend, gjysmë ore”.
Qindra automjete presin në radhë mes temperaturave të larta, ndërsa shoferët që lëvizin aty çdo ditë pohojnë se kjo situatë po bëhet shqetësuese për ta.
“Po ka mbingarkesë kanë ardhur njerëz shumë”, shprehen qytetarët.
“Shume i rënduar kemi gati ja 20 minuta sa të vish nga Tirana deri këtu, po kjo çdo ditë është këtu”, thotë dikush tjetër.
Duke konsideruar tendencën në rritje të trafikut gjatë orëve të drekës dhe pas mesditës, parashikohet që rrugët ne hyrje dhe në dalje të Elbasanit të kenë trafik të rënduar deri në mbrëmje.
