Kryeministri i Greqisë, Kyriakos Mitsotakis do të mbledhë më 21 gusht për një takim joformal në Athinë liderët e rajonit dhe përfaqësues të Bashkimit Europian.
Media greke Protothema raporton se në këtë takim do të marrin pjesë presidenti i Serbisë, Aleksandar Vuçiç, i Malit të Zi, Jakov Milatovic, kryeministri i Maqedonisë së Veriut, Dimitar Kovacevski, i Kosovës, Albin Kurti, kryeministri i Bullgarisë Nikolai Denkov, ai i Kroacisë Andrej Plenkoviç dhe i Rumanisë Ion-Marcel Ciolakou. Po ashtu, pjesëmarrës do të jenë dhe presidentja e Komisionit Evropian, Ursula von der Leyen dhe presidenti i Këshillit Evropian, Charles Michel.
Kryeministri grek Kyriakos Mitsotakis ka shmangur ftesën për homologun e tij shqiptar, kryeministrin Edi Rama, teksa Shqipëria është ftuar në nivel presidenti.
Por, kreu i shtetit Bajram Begaj ka refuzuar ftesën, dhe në një reagim të shkurtë për mediat, Presidenca thotë se shkak është bërë axhenda. “Ftesa ishte thjesht për një darkë informale dhe nuk mund të marrim pjesë për shkak të axhendës”, reagoi Presidenca për mediat.
Nuk dihet nëse arsyeja për shmangien e kryeministrit Edi Rama ka qenë çështja “Beleri”.
Rama u takua me Mitsotakisin për herë të fundit më 11 Korrik, gjatë samitit të NATO-s në Vilinus të Lituanisë. Në atë takim, Mitsotakis i ka kërkuar zgjidhjen urgjente të çështjes së Belerit, teksa i ka theksuar Ramës se në Shqipëri ka një pikëpyetje të madhe të shtetit të së drejtës, dhe sipas tij, ky element është një nga kriteret e anëtarësimit të Shqipërisë në BE.
Artikulli i plotë i medias greke:
Liderët e Ballkanit Perëndimor dhe vendeve anëtare të BE-së të rajonit do të mirëpriten mbrëmjen e së hënës së 21 gushtit, në orën 20.15 nga Kyriakos Mitsotakis në Megaro Maximos për një darkë informale mbi zgjerimin dhe të ardhmen evropiane të rajonit, me rastin e 20-vjetorit të Samitit BE-Ballkani Perëndimor dhe “Deklaratës së Selanikut”.
Madje, ftesës së kryeministrit i janë përgjigjur dhe do të marrin pjesë në darkë, presidentja e Komisionit Evropian, Ursula von der Leyen dhe presidenti i Këshillit Evropian, Charles Michel. Pjesëmarrja e tyre në darkë është sa kuptimplote dhe simbolike. Simbolike, sepse më 21 qershor u bënë 20 vjet nga “Deklarata e Selanikut” e Samitit BE- Ballkani Perëndimor që u zhvillua gjatë Presidencës greke të Këshillit të BE-së dhe që hapi rrugën për përfshirjen e disa vendeve të rajonit në Union.
Vihet re se Kyriakos Mitsotakis ka riafirmuar vazhdimisht mbështetjen e vendosur të Greqisë për perspektivën evropiane të rajonit, e cila bëhet edhe më e rëndësishme në mjedisin e ri të sfidave të krijuara nga pushtimi rus i Ukrainës. Plotësimi i 20 viteve nga Samiti i Selanikut dhe ftesa e kryeministrit drejtuar liderëve të rajonit është një mundësi për të nënvizuar se Greqia, e cila ka forcuar gjurmën e saj gjeopolitike dhe energjetike në rajon gjatë katër viteve të fundit, qëndron në krah të Ballkanit Perëndimor si anëtar i familjes evropiane, por edhe si ekonomia më e madhe në rajon dhe dëshira për integrimin e tyre evropian, për të cilin ka kushte.
Në Athinë, konkretisht në hotelin “Britania e Madhe”, presidenti i Serbisë, Aleksandar Vuçiç, i Malit të Zi, Jakov Milatovic, kryeministri i Maqedonisë së Veriut, Dimitar Kovacevski, i Kosovës, Albin Kurti do të takohen për të marrë pjesë në darkën joformale.
Shqipëria, e ftuar në nivel presidenti, nuk do të përfaqësohet, ndërsa lideri i Sllovenisë nuk ka mundur të përgjigjet pozitivisht.
Në diskutim do të marrin pjesë edhe liderët e vendeve të rajonit që janë anëtare të BE-së dhe më konkretisht kryeministri i Bullgarisë Nikolai Denkov, i Kroacisë Andrej Plenkoviç dhe i Rumanisë Ion-Marcel Ciolakou.
