Statistikat e shpërndara nga rrjeti “Eurocontrol” e rendisin Shqipërinë në vend të parë me fluksin më të madh të vizitorëve në Europë nga data 9 deri më 15 Gusht e këtij viti.
Krahasuar me vitin 2019, Shqipëria ka njohur një rritje prej 80% të fluksit të fluturimeve për periudhën 9-15 gusht. Në raportin e Eurocontrol Flights vihet re se Shqipëria ka lënë pas jo vetëm vende nga Bashkimit Europian, por edhe Kroacinë, Greqinë, ndër vendet me truizmin më të zhvilluar në Ballkan.
Të dhënat janë publikuar nga kryeministri Edi Rama, i cili në një postim në rrjetet sociale shkruan: “Ja dhe Shqipëria Turistike e para në Europë për rritjen e fluksit të fluturimeve, e pa hapur ende Aeroportin e ri Ndërkombëtar të Vlorës. Kthesa e madhe ka kohë që ka nisur, po ky është viti fantastik i shfaqjes së saj në sytë e të gjithëve, si fakt i pamohueshëm i përpjekjes së gjithanshme të gjithë këtyre viteve, duke u nisur nga vrima e fundit e kavallit”.
Kujtojmë se muaji Gusht ka nisur me një numër rekord të ardhjes së turistëve në vend, veçanërisht nga Italia. Të shumta janë mediat e huaja prestigjioze që i kanë kushtuar artikuj maleve, traditës, historisë e plazheve të Shqipërisë.
