Pak ditë më parë, një video bëri xhiron e rrjetit, ku shfaqeshin katër të rinj italian, teksa largoheshin me vrap nga një restorant në Berat, pasi nuk kishin paguar faturën e ushqimit që kishin konsumuar.
Pamjet u bënë publike nga vetë restoranti në rrjetet sociale, ku krahas videos shkruante: “Stafi ynë i uron këtyre “zotërinjve” italianë pushime të mbara dhe me lekët e PAPAGUARA në restorantin tonë bëjnë diçka të mirë!!!”.
Në lidhje me këtë ngjarje është informuar edhe kryeministrja italiane Giorgia Meloni, e cila ndodhej prej 4 ditësh me pushime në Shqipëri. Sipas kryeministrit, Edi Rama, homologia e tij italiane, sapo ka parë pamjet i ka kërkuar ambasadorit italian që të paguajë faturën e katër të rinjve që u larguan nga një restorant në Berat pa paguar. Në intervistën e dhënë për La Stampa, Rama ka treguar se Meloni i ka thënë ambasadorit Italian që duhet të paguajë faturën pasi Italia nuk mund ta humabsë respektin kështu.
“Në mediat shqiptare dhe në TikTok nuk u fol veçse për një grup italianësh që u arratisën nga një restorant në Berat pa paguar. Pronari e hodhi poshtë. Kur i thashë Giorgias, të gjithë qeshën. Ajo bërtiti dhe urdhëroi ambasadorin: “Shko dhe paguaj faturën për këta budallenj, të lutem, dhe bëj një deklaratë! Italia nuk mund të humbasë respektin kështu”, tha Rama për La Stampa.
