Shqiptari Selamet Mehmetaj, i njohur si “djalli” që furnizonte me drogë të gjithë Britaninë e Madhe është arrestuar nga policia, pas një hetimi nisur nga një ofertë e tij për t’ju shitur kanabis gazetarëve të “Mail”.
Një “baron droge”, 28-vjeçari shqiptar i cili e quan veten “Djalli”, u dënua me katër vjet e gjysmë burg për drejtimin e një ferme të kanabisit me punonjës emigrantë të paligjshëm që shpërndanin drogë me vlerë miliona paund në vit, në të gjithë Mbretërinë e Bashkuar.
Mediat britanike shkruajnë se hetimi i policisë ndaj 28-vjeçarit dhe vëllait të tij, Dior, i cilësuar nga prokurorët si ‘krahu i tij i djathtë’, erdhi pasi ai u ofroi tu shiste sasi kanabisi gazetarëve të “Mail”.
I riu grumbullonte miliona nga biznesi i tij i shitjes me shumicë të drogës, të cilën e ekspozonte në faqen e tij në Instagram të titulluar “Gjaku shqiptar”, Mehmetaj tregonte se fabrikat e tij të kanabisit dhe postonte video për të nxjerrë në pah llojet e disponueshme, duke inkurajuar klientët e rinj ta kontaktojnë.
Bosi shqiptar i drogës, ishte “rrëfyer” më parë në një intervistë për Daily Mail, ku kishte bërë të qartë se çfarë i ndodh atyre që guxojnë ta tradhtojnë në punën e tij, duke treguar me krenari se njëherë i ka prerë gishtat një klienti i cili nuk e paguante dhe se si arriti t’i merrte paratë përpara se t’i priste një këmbë.
Sakaq, Mehmetaj vazhdonte të drejtonte i lirë biznesin e tij të drogës dhe të shijonte jetën prej “playboy”.
“Fytyra e djallit shqiptar”, u prononcua për herë të parë në një intervistë njëzet minutëshe në një emision në Tiranë, ku zakonisht shfaqen yje të showbizit ballkanik, ku prezantuesja pinte shampanjë ndërsa Mehmetaj i qeshur mohoi paturpësisht çdo keqbërje.
Ai gjithashtu bëri një video rap, ku pretendonte se ishte ‘numri një’ dhe ‘i madhi në këtë vend’ dhe se si do të ‘hapte zjarr me armë’ për të mbrojtur miqtë.
Gjykata dëgjoi se si, pavarësisht se kishte bërë një pasuri nga shitja e tij e drogës, ai pagoi dy burra që kishin mbërritur ilegalisht në Mbretërinë e Bashkuar vetëm 100 £ në javë secili për të punuar me orar të plotë në dy fabrikat e tij të kanabisit të fshehura në shtëpitë periferike të Londrës Veriore.
