Një 45-vjeçar nga India ka humbur jetën tragjikisht mëngjesin e kësaj të premte, teksa ka qenë duke punuar në fabrikën e riciklimit të aluminit, në ish-kombinatin metalurgjik të Elbasanit.
Viktima është shtetasi me inicalet O.P., teksa autoritet policore bëjnë me dije se ngjarja dyshohet se ka ndodhur aksidentalisht, pasi punëtori është dëmtuar në trup nga një pajisje.
“Mëngjesin e sotëm, në ish-kombinatin metalurgjik, gjatë procesit të punës në fabrikën e riciklimit të aluminit, dyshohet se aksidentalisht është dëmtuar në trup, nga një pajisje pune, shtetasi indian O. P., 45 vjeç, i cili për pasojë ka humbur jetën”, thotë policia.
Grupi hetimor vijon punën për zbardhjen e plotë të rrethanave të ngjarjes.
