Ndryshe nga çfarë u lajmërua për një vizitë njëditore, të hënën kur Giorgia Meloni mbërriti në portin e Vlorës me tragetin e linjës së Brindisit, kryeministrja italiane ndodhet ende në qytetin bregdetar dhe pritet të largohet në mbrëmje.
Pas tre ditësh qëndrimi dhe ekspeditash në ujërat e kristaltë të Jugut, ku vila qeveritare në të cilën ajo po qëndron ka qenë hermetike, duke ruajtur rrjedhjen e informacioneve, Meloni për herë të parë është fotografuar në Lungomaren e Vlorës, pasditen e sotme.
Ajo është ndalur në një kafene, në shoqërinë e kryeministrit Edi Rama, bashkëshortit Andrea Giambruno, vajzës Ginevra, motrës së saj Arianna e bashkëshortit Francesco Lollobrigida (ministri italian i Bujqësisë), por edhe ambasadorit italian Fabrizio Bucci.
Këto janë imazhet e para të qarta të Melonit duke ecur në rrugët e Vlorës, pas videos së publikuar nga La Stampa që tregonte udhëtimin e saj me skaf për në Dhërmi.
Edhe vetë Rama me një postim në rrjetet sociale, ka ndarë një foto me Melonin ku shkruan se vizita e saj në vendin tonë ishte një nder.
“Motra nga Shqipëria Vëllai nga Italia FALEMINDERIT GIORGIA, ISHTE NJË NDER”, shkruan Rama.
Kryeministrja e Italisë erdhi në Shqipëri me ftesë të Ramës, duke ndërprerë përkohësisht pushimet e saj në Puglia, në një fermë pranë Ceglie Messapica.
