Nisma #Thurje, e cila denoncoi e para koncesionin e sterilizimit, për të cilën sot u arrestuan ish-zv.ministri i Shëndetësisë, Klodian Rjepaj dhe biznesmeni Ilir Rrapaj ka reaguar duke kërkuar që të arrestohet edhe Ilir Beqaj, apo politikanë të tjerë të nivelit të lartë.
Nisma Thurje bën thirrje që paratë e këtij koncesioni të konfiskohen dhe t’u kthehen shqiptarëve.
Në një postim në Facebook, Nisma Thurje shkruan se “inkurajojmë prokurorët e SPAK-ut që të mos kufizohen në nivelin e funksionarëve publik, por të çojnë përpara drejtësisë politikanët e lartë duke nisur që nga ish ministri Ilir Beqaj e deri ku arrin zinxhiri i vendimmarrjes”.
Reagimi i plotë:
Të arrestohet ish ministri Beqaj dhe të sekuestrohet pasuria e vjedhur!
Nisma Thurje përgëzon SPAK-un për arrestimet e sotme. Çdo hap në avancimin me hetimin e kallëzimit të depozituar nga Nisma Thurje në Dhjetor të vitit 2019 është një hap në drejtim të rikthimit të besimit tek drejtësia.
I inkurajojmë prokurorët e SPAK-ut që të mos kufizohen në nivelin e funksionarëve publik, por të çojnë përpara drejtësisë politikanët e lartë duke nisur që nga ish ministri Ilir Beqaj e deri ku arrin zinxhiri i vendimmarrjes.
Gjithashtu presim që paratë që i janë vjedhur shtetit shqiptar të konfiskohen dhe t’u rikthehen shqiptarëve. Vilat që janë ndërtuar me paratë e sterilizimit të kthehen në qendra shëndetësore shtetërore.
Populli shqiptar i ka sytë nga drejtësia e re. Katër vite kanë kaluar që nga denoncimi ynë. Nuk ka më kohë për të humbur.
