Universiteti i Mjekësisë ka përcjellë ngushëllimet e tij për ndarjen nga jeta dje të një figure të shquar të fushës si Dr. Fadil Spahiu.
Mesazhin e shpërndarë publikisht me një portret për mjekun e nderuar, ky universitet e ka filluar me thënien” Mjekësia nuk burgoset!”.
“Në të gjitha profesionet që ekzistojnë i vetmi që nuk mund të burgoset ështe profesioni i mjekut, – shkruan Universiteti. – Mund të burgosin një individ, por kurrsesi profesionin e tij, pasi profesioni i mjekut është i domosdoshëm kudo dhe kurdo. Një mjek i burgosur ka të burgosur qënien e tij, por jo profesionin e tij.
I tillë është rasti i Dr. Fadil Spahiut që ka mbyllur sytë sot pas një jete plot sfida të vështira.
Si një rebel i pashmangshëm dr. Fadil Spahiu në adoleshencën e tij ka rrezikuar shpesh përjashtimin nga Gjimnazi i Shkodrës për shkak të pjesëmarrjes së tij në Lëvizjen Antifashiste Nacionalçlirimtare.
Në vitin 1946 fillon studimet në Fakultetin e Mjekësisë në Sarajevë për t’u zhvendosur më pas në Bashkimin Sovjetik, ku do të diplomohej në Universitetin e Mjekësise të Moskës, duke marrë gradën ” Kandidat i Shkencave Mjekësore”.
Kthehet në Shqipëri me pasionin dhe idealizmin e një të riu duke lënë një emër të mirë si pedagog dhe mjek ne Fakultetin e Mjekësisë, por shpallet ” Armik i Popullit” duke u larguar fillimisht në Gramsh dhe në Tepelenë. Largimi nuk mjaftonte. Duhej edhe arrestimi. Nën akuza të rreme arrestohet dhe bën plot 18 vite burg në regjimin komunist.
Arrestuan Dr. Fadil Spahiun, por jo profesionin e tij. Gjatë 18 viteve burg shërbeu si mjek për të burgosurit dhe doli nga burgu në vitin 1986 për të vazhduar jetën e tij mes librave të mjekësisë.
Dr. Fadil Spahiu është mishërimi i thënies se mjekësia nuk mund të burgoset. Universiteti i Mjekësisë shpreh ngushëllimet për familjen dhe miqtë e Dr. Fadil Spahiut.”- shkruhet në postim.
