Ligjin në Ekuador po e bëjnë bandat pavarësisht se qeveria ka vendosur në fuqi gjendjen e jashtëzakonshme për goditjen e tyre, menjëherë pas vrasje javën e shkuar të kandidatit për president, presidencial Fernando Villavicencio.
Duket se ekzekutimi i ish-gazetarit që i shpalli luftë krimit, pas një takimi elektoral në kryeqytetin Quito, i ka hapur rrugën një vale të re sulmi mbi botën e politikës, pasi lideri i një partie lokale është vrarë këtë të martë.
Pedro Briones u bë politikani i dytë që vritet brenda një jave. Ai u qëllua për vdekje në shtëpinë e tij në provincën veriore Esmeraldas, nga persona të armatosur që lëviznin me një motoçikletë.
Briones ishte një udhëheqës i Partisë së Revolucionit Qytetar të krahut të majtë në Esmeraldas. Anëtarët e partisë i shprehën ngushëllimet familjes së tij.
Kandidatja presidenciale e parties së të ndjerit, Luisa González, tha se Ekuadori po kalon “periudhën e tij më të përgjakshme”.
Ish-presidenti Rafael Correa, i cili themeloi Partinë Revolucioni Qytetar, gjithashtu reagoi duke thënë: “Ata vranë një tjetër nga kolegët tanë në Esmeraldas. Mjaft më!”
Sakaq, policia ende nuk e ka komentuar zyrtarisht vrasjen, por mediat lokale raportuan se dy personat e armatosur kishin ikur me një motoçikletë pasi qëlluan për vdekje Briones në San Mateo.
Nuk dihet ende se cili mund të ketë qenë motivi i mundshëm, por provinca Esmeraldas, në kufirin me Kolumbinë, ka qenë një nga vendet më të goditura nga vala e dhunës e cila është përhapur në të gjithë vendin.
Shkalla e vrasjeve në Ekuador është rritur pasi bandat lokale kanë krijuar aleanca me kartelet ndërkombëtare të krimit. Vrasjet e politikanëve kanë tronditur vendin përpara zgjedhjeve të parakohshme presidenciale më 20 gusht.
Viktima e profilit më të lartë deri më tani ka qenë Fernando Villavicencio, që kishte zbuluar skandale korrupsioni dhe kishte denoncuar lidhjet midis krimit të organizuar dhe zyrtarëve qeveritarë.
Gjashtë burra janë arrestuar në lidhje me vrasjen e tij, të gjithë shtetas kolumbianë.
Agjentët e FBI mbërritën në vend nga SHBA të dielën dhe kanë bashkuar forcat me policinë ekuadoriane për të hetuar vrasjen e Fernando Villavicencio.
