Tre punëtorë në minierën e Bulqizës kanë pësuar djegie trupore si pasojë e shpërthimit të një sasie gazi. Policia thotë se tre punëtorët ndodhen në kujdesin e mjekëve dhe janë jashtë rrezikut për jetën.
Minatorët e plagosur janë identifikuar si Rrahim Karaj, Asllan Çakalli dhe Trifon Snalla.
Janë evakuuar të gjithë punëtorët nga fronti i punës dhe rrjedhja e gazit është vënë nën kontroll.
“Në një subjekt minerar, në Bulqizë, gjatë punës në nivelin 17 të pusit, dyshohet se ka shpërthyer një sasi gazi dhe për pasojë kanë pësuar djegie trupore tre punëtorë që ndodheshin në këtë nivel, konkretisht shtetasit F.S; Rr.K., dhe A.Ç. Të lënduarit po marrin ndihmë mjekësore dhe ndodhen jashtë rrezikut për jetën.
Është bërë menjëherë evakuimi i të gjithë punëtorëve nga fronti i punës dhe rrjedhja e gazit është vënë nën kontroll.”– njofton policia.
Grupi hetimor ndodhet në vendin e ngjarjes dhe po punon për zbardhjen e shkaqeve të plota të kësaj ngjarjeje.
