Banorët e Fierzës në Tropojë kanë dalë ditën e sotme sërish në protest kundër shfrytëzimit pa kriter të materialeve inerte anës rrugës dhe ndërtimit të fabrikës së bitumit, pranë ujësjellësit të kësaj njesie, vetëm 50 metra larg rrugës nacionale Fierzë-sheshi i trageteve – Bajram Curri.
Në shenjë proteste ata kanë bllokuar me mjetet e tyre edhe aksin nacional Firzë-Sheshi Trageteve-Bajram Curri, duke shkaktuar radhë automjetesh dhe të bllokuar kanë ngelur edhe punonjësit e Hecit të Fierzës, të cilët po udhëtonin në këtë aks nga Bajram Curri në Fierzë.
Banorët kanë ngritur pretendimet se guroret po shkatërrojnë habitatin natyrorë të Bjeshkëve, turizmin malorë, ndotjen e ujit të pijshëm dhe vështirësojnë jetesën e tyre. Kjo protestë pason një sërë protestash të tjera që kanë bërë banorët, deri më tani zëri i tyre nuk është dëgjuar. Ata pretendojnë se aktiviteti i guroreve dhe fabrikës së bitumit nuk kanë asnjë dokumentacion ligjorë.
Një oficer policie ka kërkuar që protestuesit të lirojnë rrugën dhe ka kërkuar që një përfaqësues i tyre të vijë me të në komisariat, por banorët kanë treguar vendosmëri dhe bashkim në qëllimin e tyre
“Jo, mos u merr me njërin prej nesh. Na arresto të gjithë, jo njërin. Doni të na arrestoni?! Vijmë të gjithë atje, hapini dyert, jo vetëm njeri. Se kemi dalë për fëmijët tanë, jemi në protestë paqesore” kanë thënë ata.
