Ashtu siç ishte paralajmëruar, deputeti grek i partisë “Demokracia e Re” të kryeministrit Kyriakos Mitsotakis ka vizituar sot kryebashkiakun e zgjedhur të Himarës, Fredi Beleri në paraburgimin e Qendrës Spitalore të Burgjeve.
Vizita e Syrgios në Tiranë si misionar i Greqisë për çështjen Beleri vjen vetëm 3 ditë para se të përfundojë afati zyrtar që Ligji Zgjedhor përcakton për betimin e një personi të zgjedhur në krye të një institucioni të qeverisjes vendore.
Pas përfundimit të afatit tre mujor për betimin e kryetarit të zgjedhur, që në rastin Beleri skadon të hënë, legjitimohet çdo veprim i KQZ për të vazhduar përsëritjen e zgjedhjeve.
Këtë shqetësim e ka shprehur edhe Syrgios, teksa foli për mediat shqiptare pak pas takimit me Belerin.
Sipas deputetit grek nuk është e drejtë që kryebashkiaku i Himarës të mos betohet, pasi vendimi për ta ndalur diçka të tillë shkel të drejtat civile.
Syrgios ndër të tjera ka kërcënuar hapur qeverinë shqiptare se çështja Beleri do të ndikojë në procesin e anëtarësimit të Shqipërisë në Bashkimin Europian.
“Kjo do të shkaktonte dëmtim të dy vendeve tona. E para është shteti ligjor dhe prezumimi i pafajësisë për një kryetar që është zgjedhur kryetar bashkie dhe të drejtat civile. Nuk është e kuptueshme për ne se pse një person që është zgjedhur kryebashkiak nuk mund të shkojë të bëjë betimin në zyrën e tij. Kjo gjë mund të bëhet pengesë për integrimin e Shqipërisë në BE. Nëse ky është rasti atëherë ligji do të kishte thënë që një person që ka kryer shkelje, nuk duhet të bëjë betimin, por ligji nuk e thotë këtë. Hapi tjetër do të ndodh fatkeqësisht në BE. BE luan një rol të rëndësishëm në respekt të shtetit të së drejtës dhe pakicës civile”, tha deputeti helen.
