Max Verstappen fitoi garën e 10-të sezonale nga 12 të zhvilluara në total duke qenë se edhe në Çmimin e Madh të Belgjikë, RedBull-i i pilotit holandez kishte një “marsh” më shumë se njëvendëshet e tjera në pistën e SPA-Francorchamps.
Dy herë Kampioni i Botës u nis nga vendi i gjashtë, por brenda xhiros së 17-të i parakaloi të gjithë ata që kishte përpara dhe më pas pati mundësinë të shkelte në maksimum gazin për t’iu shkëputur rivalëve.
Distanca vetëm sa rritej në çdo xhiro që kalonte dhe në fund, Verstappen pati luksin edhe të komunikonte në radio me mekanikët duke i propozuar një pit-stop edhe pse nuk kishte nevojë për një të tillë. Verstappen iu tha mekanikëve që të bënin një pit-stop ekstra si një provë për garat e radhës. Një kërkesë që nuk u pranua nga bokset e RedBull-it të cilët e urdhëruan 25-vjeçarin të vazhdonte garën.
Një mesazh i tillë ka sjellë edhe irritimin e tifozerisë së Formula 1 që e cilësojnë Verstappen si një arrogant që shfrytëzon epërsinë e makinës edhe për të vënë në lojë kundërshtarët e për t’i bërë edhe më të dukshme diferencat me rivalët e tij.
Kujtojmë se tashmë Formula 1 është ndërprerë për periudhën e pushimeve të verës dhe do të rikthehet vetëm në fundin e muajit gusht në Çmimin e Madh të Holandës, teksa Max Verstappen kryeson me 314 pikë, 125 më shumë se ndjekësi më i afërt Sergio Perez dhe vazhdon i qetë rrugën drejt titullit të tretë botëror.
