Nga Boldnews.al
Shoqëria “Aiba Company”, në pronësi të Armando Dukës, njëkohësisht edhe kreu jetëgjatë i Federatës Shqiptare të Futbollit (FSHF) rezulton të ketë përfituar 107 mijë euro nga fondet e Bashkimit Europian për mbështetjen e sektorit të bujqësisë në Shqipëri, nëpërmjet projekti “IPARD II”.
Të dhënat zyrtare tregojnë se kompania me qendër në Shkozet ka aplikuar dhe ka nënshkruar kontratë me Agjencinë e Zhvillimit dhe Bashkëpunimit Rural (AZHBR) për një shumë prej 13.5 milionë lekë të reja të taksapaguesve europianë.
Vlera totale e projektit është në shumën 237 mijë euro dhe synimi është “Impiant per tharjen e glasave te pulave dhe zogjve”.
Kontrata ndërmjet kompanisë së Armando Dukës dhe AZHBR-së, e cila menaxhon fondet e projekteve IPARD, është nënshkruar në maj 2020 dhe kishte afat deri në dhjetor të atij viti.
Vëmendja e opinionit publik shqiptar u fokusua ditët e fundit tek mënyra e shpërndarjes së fondeve të Bashkimit Europian për bujqësinë në Shqipëri, pasi Komisioni Europian njoftoi pezullimin e lëvrimit të shumave të tjera monetare, në bazë të projektit “IPARD III”.
Sipas burimeve zyrtare nga Komisioni Europian, masa e pezullimit të përkohshëm të fondeve u mor pas një hetimi të gjerë që ka nisur Zyra e Anti-Mashtrimit në Bruksel, OLAF.
“Zëri i Amerikës” raportoi më herët se kjo masë pezullimi u mor, pasi në Bruksel kishin mbërritur denoncime të shumta mbi shpërndarje abuzive dhe me bazë korruptive të fondeve të “IPARD II” në Shqipëri.
Sipas të njëjtës media, inspektorët e OLAF kanë marrë denoncime me fakte konkrete dhe janë duke verifikuar veprimtarinë e autoriteteve shqiptare për mënyrën se si autoritetet shqiptare, e më konkretisht AZHBR dhe Ministria e Bujqësisë, kanë përdorur fondet europiane.
Mediat në Shqipëri kanë raportuar në mënyrë periodike se qindra mijëra euro të projektit “IPARD II” kanë përfunduar në llogaritë e kompanive apo personave të lidhur politikisht apo familjarisht me zyrtarë të nivelit të lartë.
Armando Duka i FSHF-së ka pasur raporte të lëkundura me drejtuesit e lartë qeveritarë. Ai është parë shpesh në shoqërinë e Edi Rama, madje u vendos si “koperturë” elektorale e kryeministrit gjatë fushatës për zgjedhjet lokale të majit 2023.
Duka ishte i pranishëm në aktivitetet me natyrë elektorale të Ramës, kur ky i fundit premtonte fusha futbolli në qytete të ndryshme të Shqipërisë.
Nga ana tjetër, jo shumë kohë më parë, Duka ka pasur raporte tepër konfliktuale me beniaminin politik të Edi Ramës, kryebashkiakun e Tiranës, Erion Veliaj.
Ky i fundit u duk i vendosur për ta penguar Dukën që të merrte mandatin e gjashtë në krye të Federatës së Futbollit. Por, në përfundi, Armand Duka u rizgjodh në krye të futbollit shqiptare dhe, në vijim, punësoi pranë FSHF-së njerëz që njihen për lidhjet e ngushta me kryebashkiakun e Tiranës, Erion Veliaj.
