Një tjetër plagosje me armë zjarri ka ndodhur mëngjesin e sotëm në Fier, jashtë një lokali në vendin e quajtur ‘Vija e Ngjalës’.
Mësohet se pas një konflikti të çastit, shtetasi Ledion (Enea) Nebiu, ka qëlluar me armë drejt 33-vjeçari Orges Buzi, , i cili është dërguar në spital në gjendje të rënë për jetën.
Ndërkohë është shpallur në kërkim autori i krimit.
“Rreth orës 06:00, në vendin e quajtur “Vija e ngjalës”, pas një konflikti të çastit, në ambientet e jashtme të një lokali, është plagosur me armë zjarri pistoletë shtetasi O. B., 33 vjeç, banues në Fier, i cili ndodhet në spital, në kujdesin e mjekëve.
Shërbimet e Policisë kanë bërë të mundur identifikimin e autorit të dyshuar, shtetasit L. (E). N., 30 vjeç, banues në Patos, dhe janë vënë në ndjekje të tij.
Eshtë rrethuar zona, si dhe vijojnë kontrollet në zonë dhe në ambiente të ndryshme, për të bërë të mundur kapjen e këtij shtetasi”,- njofton Policia.
Grupi hetimor ndodhet në vendngjarje dhe ka sekuestruar kamerat e sigurisë dhe çdo provë tjetër që do t’i shërbejë dokumentimit të plotë të ngjarjes.
Vijon puna në bashkëpunim me Prokurorinë për zbardhjen e plotë të kësaj ngjarjeje.
