Pasditen e të mërkurës së 26 korrikut, në orën 17:30, kryeministri Edi Rama ka planifikuar të mbledhë në Tiranë Asamblenë e Partisë Socialiste.
Në mbledhjen e Asamblesë, Rama pritet të mburret se sa para e ka çuar PS-në nga fitorja në fitore dhe përgjegjësitë që lindin pas këtyre fitoreve, teksa nuk do të mungojnë dhe kritikat e përhershme të tij ndaj të tijëve.
Burime për mediat bëjnë me dije se në mbledhjen e Asamblesë, pritet të caktohet dhe kryetari i ri i grupit parlamentar të PS-së, pas emërimit të Taulant Ballës në krye të Ministrisë së Brendshme. Gjithashtu, nuk përjashtohet mundësia që prej kësaj asambleje Rama të bëjë disa ndryshime dhe për sa i përket drejtuesve politik në disa qarqe.
Për momentin, nuk pritet të ketë ndryshime në kabinetin qeveritar, edhe pse tashmë socialistët janë mësuar se ata që emërohen ministra e marrin vesh vetëm kur Rama e thotë publikisht dhe nuk përjashtohen surprizat.
Pas mbajtjes së Asamblesë së PS-së, mësohet se kryeministri Edi Rama ka planifikuar një takim dy ditor informal, në datat 28-29 Korrik, me të gjithë ministrat, i cili planifikohet të mbahet në Tepelenë, në këto ditë tënxehta vere.
