Familja Zogu ka hapur dyert e mortit ditën e sotme në fshatin Cingar të Gramshit, për t’u dhënë lamtumirën e fundit familjarëve të tyre.
Arben Zogu, 46 vjeç dhe dy djemtë e tij, Ruben dhe Esti Zogu (19 dhe 14 vjeç) dhe nipi i 46-vjeçarit, Melsi Zogu 20-vjeç, humbën jetën tragjikisht pasditen e djeshme ku u mbytën në liqenin e Banjës. Dyshohet se ata janë futur për t’u larë dhe pasi është mbyturi pari, në përpjekje për të shpëtuar njëri-tjetrin janë mbytur të katërt. Trupat e pajetë u nxorrën pas 90 minutash kërkime nga polumbarët, teksa u gjetën pranë njëri-tjetrit.
Të tronditur nga kjo ngjarje e rëndë, të afërm dhe miq kanë shkuar në banesën e familjes Zogu për ngushëllim, teksa në orën 17:00 do të përcillen për në banesën e fundit.
“Ngjarje e rëndë shumë është. Krim është. U mbyll dera e një familjeje, tjetri një çun pati. Merreshin me bujqësi”, u shpreh një banor.
“Jam shokuar kur e kam dëgjuar dhe e njoh mirë kush është. Banja për t’u larë nuk është. Shteti të bëjë kufizime, asgjë më tepër. Të paktën mos të ndodhin gjëra të tjera më sepse kanë ndodhur shumë në këtë pjesë liqeni”, tha një banor tjetër.
Banorët e fshatit Cingar tregojnë për mediat se në liqen ekzistojnë disa gropa të thella që janë krijuar gjatë ndërtimit të HEC-it të Benjës. Ata thonë se ka rreth 10 raste mbytjeje në liqenin e Banjës që prej ndërtimit të HEC-it, teksa i bëjnë apel shtetit që të marrë masa dhe mos përsëriten më tragjedi të tilla.
