Së bashku me Regi Lushkjen, mesfushori Ardit Deliu ishte protagonisti absolut në triumfin e Tiranës, mbrëmjen e sotme ndaj gjeorgjianëve të Dinamo Batumi, ku siguruan kualifikimin për raundin e radhës të Conference League, ku për herë të parë në histori do të përballen me “gjigandët” turq të Besiktas.
Me përfundimin e ndeshjes, Deliu dha dhe një prononcim të shkurtër për mediat, teksa theksoi se ishte shumë i lumtur për golin e shënuar, si dhe për kualifikimin, teksa shtoi se nuk ishte aspak e lehtë për t’u arrirë ndaj një skuadre si Dinamo Batumi.
“Jam shumë i lumtur për golin dhe për kualifikimin. Nuk ishte e lehtë, sepse Dinamo Batumi ishte një skuadër shumë e fortë dhe e organizuar mirë.
Ishte një arritje e madhe për ne. Fituam një ndeshje shumë të vështirë. Rastësi shumë e bukur që shënuan dy lojtarë nga Kavaja, sepse unë me Regin jemi të dy nga Kavaja.
Beshiktashi? Është një nga skuadrat më të mëdha në botë dhe jam shumë i lumtur që do të ndeshemi me ta. Mendoj se është ëndërr për çdo lojtar nga kampionati ynë që të ndeshet me kundërshtarë të tillë”,- u shpreh Deliu, me përfundimin e ndeshjes.
